CXCV.

1346, September 9. Baitzen.

Nicolaus von Danielwitz bestellt Laurentius, Vicepleban in Baitzen, zu seinem Prokurator in der Streitsache mit dem Kloster wegen eines Wasserwehres und Wasserlaufs.

In nomine domini amen. Noverint universi presentem paginam inspecturis, quod ego Nicolaus de Danielwicz cum domina Elysabeth uxore mea legittima, necnon Niczcone, Heynczkone, Ramfoldo, Lutkone ac . . aliis omnibus et singulis meis filiis legittimis facio, constituo, et prout melius possum, ordino discretum virum, dominum Laurentium, in Byczano viceplebanum, meum verum et legittimum procuratorem et nuntium specialem in causa, quam habeo cum patre reverendo, fratre Syghardo abbate in Kamencz et suo conventu ibidem ratione rectificationis gadium et granetiarum, de quodam obstaculo fossati ipsius molendini videlicet cuiusdam meatus rivuli de eodem obstaculo fluentis usque ad maiorem fluvium ipsius Nyse et etiam sortium agrorum quarundam a parte littoris utriusque adiacentium ibidem, do et concedo, confirmationi et ratificationi interesse meo nomine super premissis iuxta tenorem et continentiam cuiusdam instrumenti seu contractus sub meo sigillo confecti, qui inter me et prodictum dominum abbatem et suum conventum dudum fuit celebratus, sibi meo nomine, uxoris mee et heredum meorum nominibus predictorum, do et reddo plenam et liberam potestatem coram honorabili viro, magistro Andrea de Rosslawicz, officialis Wrat. recognoscendi viginti octo marcas de contractu inter me et heredes meos predictos parte ex una, et religiosos viros dictos scilicet abbatem et conventum parte ex altera, habito et inito recepisse et per ipsos rite et rationabiliter pagasse et persolvisse, et nichilominus me una cum meis heredibus predictis censure ecclesiastice dicti officialis submittendi omnibus exceptionibus tam iuris canonici, quam civilis renunciandi, per quam dictus contractus infirmari vel annullari posset, et promittendi contra dictum contractum nullomodo contravenire, sed potius ipsum inviolabiliter observare sub censura prenotata. Insuper promitto ratum et gratum habiturum, quicquid per ipsum procuratorem actum fuerit in premissis et nihil­ominus relevare, ab omni onere satisdandi sub obligatione omnium bonorum meorum ypotheca. Datum et actum in Byczano nona die mensis Septembris anno domini M° CCC° quadragesimo sexto; presentibus testibus: Henrico de Opol presbytero, Conrado clerico in Byczano et Petro tabernatore ibidem. In cuius rei testimonium meum sigillum presentibus est appensum.

Transsumt in No. CXCVII.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.